რატომ აცხადებენ ID ბარათებზე უარს ევროპის ქვეყნები?
15.08.2011, 13:14
საქართველოში 2011 წლის 1 აგვისტოდან ახალი ელექტრონული პასპორტების გამოყენება ძალაში შევიდა. როგორც იუსტიციის სამინისტროში განმარტავენ, ID ბარათის გამოყენებით მოქალაქეს შეუძლია კომპიუტერის მეშვეობით სხვადასხვა დოკუმენტს მოაწეროს ხელი, გაგზავნოს ელექტრონული ფოსტა, გადაიხადოს სხვადასხვა კომუნალური გადასახადები, აწარმოოს საკუთარი ანგარიშის მართვა და სხვა სერვისები.
პირადობის მოწმობის მიკრო ჩიპზე საპენსიო წიგნაკი, დევნილის მოწმობა და ყველა ტიპის პლასტიკური ბარათის ჩატვირთვაა შესაძლებელი, ხოლო უნიკალური კოდის გამო გაყალბება შეუძლებელია. იუსტიციის სამინისტროს განცხადებით, ID ბარათი იმდენად უნივერსალურია, რომ იგი მნიშვნელოვნად გაამარტივებს მოქალაქეთა ცხოვრებას და იგი გახდება ჩვენი წინსვლისა და წარმატებების საწინდარი. შეიძლება ითქვას, რომ იგი ლამის "ნატვრის თვალია”.
პრეზიდენტის განცხადებით, ჩვენ გავუსწარით ევროპის ქვეყნებს და ისინი ამ საკითხში ჩამოგვრჩნენ.
საინტერესოა რა ხდება მართლაც სხვა ქვეყნებში, ამ საკითხთან დაკავშირებით. დავინტერესდით და აღმოჩნდა, რომ არსებობს სხვა მოსაზრებებიც.
ათონის წმიდა მთის წმიდა კინოტმა საბერძნეთის პარლამენტში წარმოდგენილი კანონპროექტის – ელექტრონულ მმართველობასთან და "ელექტრონული მოქალაქის ბარათებთან” დაკავშირებით განცხადება გააკეთა:
ელექტრონულ მმართველობასთან და "მოქალაქის ელექტრონულ ბარათთან” დაკავშირებით ათონის წმიდა მთის წმიდა კინოტის
გ ა ნ ც ხ ა დ ე ბ ა
"მოქალაქის ელექტრონული ბარათი” მოქალაქის პიროვნების იდენტიფიცირებას ახდენს, რიცხვით სისტემაში რთავს და თავის ელექტრონულ მფლობელობაში აქცევს. უფრო მეტიც, ამის შედეგად ყველა ასეთი ბარათის მქონე მოქალაქე ერთვება კომპიუტერულ სისტემაში, რომელიც მუდმივად კონტროლს გაუწევს ადამინების ქმედებას და დაამუშავებს მონაცემებს მათი პირადი ცხოვრების შესახებ (ეკონომიური მდგომარეობა, ჯანმრთელობის მდგომარეობა, სამუშაო, სოციალურ-საზოგადოებრივი მოღვაწეობა, ურთიერთობა… ), რაც თავისი არსით, ფაქტობრივად, აუქმებს ადამიანის მთავარ ღირებულებას – პიროვნულ თავისუფლებას. რადგანაც ამ სისტემაში ყოველთვის შესაძლებელია ინფორმაციის ადვილად შეცვლა, ვფიქრობთ, რომ ის ქრისტიანებისთვის რეალურ საშიშროებას წარმოადგენს, მათი რელიგიური სინდისის თავისუფლებას არღვევს, ართმევს მათ უფლებას, დაბრკოლების გარეშე იქადაგონ თავიანთი სარწმუნოება და სახარება. გარდა ამისა, ძალაუფლება, რომელიც იყენებს ამ სისტემას, გადადის გაურკვეველი ხელმძღვანელობისა და პირების ხელში, როგორც სახელმწიფო მოხელეების, ასევე კერძო პირების მხრიდან. მათ საშუალება ეძლევათ, შეიტანონ ან წაშალონ მათთვის სასურველი ნებისმიერი ინფორმაცია ბარათიდან, გაუცნობიერებელ ადამიანებს შეატყუონ მორწმუნეთათვის სასტიკად მიუღებელი და ანტიქრისტიანული სიმბოლოები.
ყოველივე ზემოთ აღნიშნული მიზეზების გათვალისწინებით, ათონის წმიდა მთის წმიდა კინოტი თავის სერიოზულ შეშფოთებას გამოხატავს და მიმართავს მხურვალე თხოვნით საბერძნეთის მთავრობას, არ დაუშვან მოქალაქის ელექტრონული მოწმობის გამოშვება და მორწმუნეებს ურჩევენ, გამოიყენონ ჩვეულებრივი საიდენტიფიკაციო საშუალებები. ამ ტიპის ბარათების ძალადობრივი დანერგვა ჩვენს საზოგადოებაში ხალხის წინააღმდეგობას აუცილებლად ჰპოვებს. ჩვენ, როგორც ჭეშმარიტ ქრისტიანებს, გვწამს, რომ ქრისტემ სძლია ამა სოფელს.
არ უნდა დავეთანხმოთ იძულებით და თავისუფლების შემზღუდველ მოქმედებებს. ჩვენ მთელი სულითა და გულით ვლოცულობთ ზეციური დედოფლის წინაშე, რომელიც მფარველია წმიდა მთისა, რათა მოჰმადლოს ნიჭი ღვთისმოსავ ხალხს, მოთმინებით გაუძლონ ცხოვრებისეულ განსაცდელებს იმ გარემოში, სადაც დღეს უწევთ მათ არსებობა, რასაც ყველა განვიცდით”.
კრებაზე მონაწილეობას იღებდა ათონის წმიდა მთის ოცივე მონასტერი.
ასევე აღმოჩნდა, რომ ID ბარათებზე უარს აცხადებენ ევროპის სხვა ქვეყნებიც.
ინგლისის ახლანდელმა პრემიერ-მინისტრმა დევიდ ქემერონმა ქვეყანაში ID ბარათებზე კანონპროექტი გააუქმა – "ათასი გზა არსებობს, ელექტრონული სივრცე რომ შევავსოთ, პიროვნების საიდენტიფიკაციო რეგისტრაცია სხვა მრავალი გზით არის შესაძლებელი, თანხა ჯობს უფრო მნიშვნელოვან სფეროებზე დაიხარჯოს. ჩვენთან არ საჭიროებს ეს ბარათები, თუ უნდათ ამერიკაში – იქ იმუშაოს”.
ბრიტანეთის კონტრდაზვერვის MI5 – ის სამსახურის ხელმძღვანელი სტელა რიმინგტონი ღიად წინააღმდეგ გამოვიდა: ეს პირადობის მოწმობები ვერ იქნება გარანტი ტერორიზმთან ბრძოლის საქმეში. აღმოჩნდა, რომ ათასობით მოქალაქის საიდენტიფიკაციო მონაცემები ხელმისაწვდომი იქნებოდა 265 სამთავრობო დეპარტამენტისა და 48 ათასი აკრედიტირებული კერძო კომპანიისათვის.
საფრანგეთში ელექტრონული პირადობის მოწმობების დანერგვის წინააღმდეგ ადამიანის უფლებათა დამცეველბი და იურისტები აქტიურად გამოვიდნენ. მათ აღნიშნული დოკუმენტი "უმაღლესი ზიანის შემცველად მიიჩნიეს”. საფრანგეთის მაგისტრატურის მუშაკთა პროფკავშირების გენერალურმა მდივანმა კომ ჟაკმენმა განაცხადა: "ამ პროექტის ამოქმედება საზოგადოებაზე პოლიციური ზედამხედველობის გაძლიერებას გულისხმობს. ელექტრონული პირადობის მოწმობების შემოღების შემდეგ პოლიციას ექნება 65 მილიონი ადამიანის პირადი მონაცემი, რაც, ფაქტობრივად, ქვეყნის მთელ მოსახლეობას მოიცავს”. ეს არგუმენტები ქვეყნის საინფორმაციო ტექნოლოგიების ეროვნულმა კომისიამ გაითვალისწინა. დღესდღეობით საფრანგეთის მოქალაქეთა საფულეში ნამდვილად ვერ იპოვით ელექტრონულ პირადობის მოწმობებს.
ათენისა და სრულიად ელადის არქიეპისკოპოსი იერონიმე II
"ეკლესია მთლიანად მხარს უჭერს ისეთ მოქმედებას, თუნდაც მოძრაობას, რომელიც ადამიანის პიროვნების თავისუფლებასა და მისი უფლებების დაცვას ემსახურება, რა ფორმითაც არ უნდა იყოს ის გამოხატული,” – განაცხადა უნეტარესმა იერონიმემ პოლიციის თანამშრომლებთან შეხვედრისას, რომლებმაც არ მიიღეს ახალი პირადობის მოწმობები. შეხვედრა საეპისკოპოში არქიეპისკოპოს იერონიმეს ინიციატივით შედგა. მან აღნიშნა: "ნებისმიერი სახის მოძრაობა, რომელიც ადამიანის უფლებათა დაცვის ჩარჩოებშია, ყოველთვის ჰპოვებს ეკლესიიდან თანხმობასა და ურთიერგაგებას”.
რადგან ქართულ საზოგადოებაში არის დიდი დაინტერესება ამ თემით, ჩვენ შევეცდებით შემდეგშიც მოგაწოდოთ ინფორმაცია და განსხვავებული მოსაზრებები, ამ საკითხებთან დაკავშირებით.
საქართველოში 2011 წლის 1 აგვისტოდან ახალი ელექტრონული პასპორტების გამოყენება ძალაში შევიდა.
