"ელექტრონული პირადობები კლასიკური იძულებაა”…
მოდერნიზებული პირადოდების გაცემა საქართველოში დაწყებულია, თუმცა საზოგადოება რეალურ ინფორმაციას აღნიშნულ პასპორტებთან დაკავშირებით ვერ იღებს. 
განვითარებული ევროპის ქვეყნების კვლევით აღმოჩნდა, რომ მოქალაქეების საიდენტიფიკაციო მონაცემები დაინტერესებულ პირთათვის ხელმისაწვდომი იქნება.
საშუალო დონის ხაკერებსაც კი საშუალება ეძლევათ, შევიდნენ მონაცემთა ბაზაში, შეცვალონ ინფორმაცია და იმოქმედონ საკუთარი მიზნების მიხედვით. ამგვარი ექსპერიმენტები კი ინგლისში, სახელმწიფო დონეზეა ჩატარებული.
რა საშიშროების მატარებელია ელექტრონული ბარათები და რა დამოკიდებულებაა ამ მხრივ საქართველოში? ამ თემაზე "ამბიონს” ანჩისხატის მომლოცველთა კრებულის ხელმძღვანელი ზაზა ნანობაშვილი ესაუბრა:
"ეს იმდენად აუცილებელი და სერიოზული თემაა, რომ ამაზე საუბრისას დიდი სიფრთხილე გვმართებს.
ბოლო პერიოდში, განსაკუთრებით პირველი აგვისტოდან, რაც ელექტრონული პასპორტების გაცემა დაიწყო, საზოგადოება მიხვდა, რომ არანაირ ნებაყოფლობითობაზე არ არის საუბარი. მათ იმედი ჰქონდათ, ეს ნებასურვილზე იქნებოდა დამოკიდებული… თუმცა მეტად სამწუხაროა და სამარცხვინოც კი, როდესაც ხელისუფლების წარმომადგენელი აცხადებს, რომ ახალი ელექტრონული პასპორტების აღება იძულებით ფორმას არ მიიღებს და სინამდვილეში საზოგადოებას ალტერნატივას არ უტოვებს. ეს პრაქტიკულად ხალხის მოტყუება და კლასიკური იძულება გახლავთ.
განსაკუთრებით ქრისტიანობა და დღევანდელი დემოკრატიული პრინციპები გმობს იძულებას და ის, რაც ძალადობაზეა აგებული, ბოროტება და დანაშაულია.
მინდა აღვწერო, რა ხდება უცხოეთში მოდერნიზებულ პასპორტებთან დაკავშრებით:
განვითარებულმა ევროპულმა ქვეყნებმა ამგვარი საბუთები დაგმეს არა მარტო მართლმადიდებლური და რელიგიური თვალსაზრისით, არამედ როგორც ადამიანის ნების შემლახავი და ტოტალური კონტროლის საშუალება. ეს შეფასება შემთხვევითი არ გახლავთ. ამაზე წლების მანძილზე მუშაობენ კომისიები, აქვთ სერიოზული გამოცდილება აღნიშნულ საკითხებთან დაკავშირებით და აქედან გამომდინარე, მათი დასკვნები ჩვენთვის ძალიან კომპეტენტურია იმ თვალსაზრისითაც, რომ მაგალითებს სწორად ასახელებენ. მაგალითად, ინგლისის კონტრდაზვერვას მოჰყავს მაგალითი უსაფრთხოების თვალსაზრისით. ჩატარებული აქვთ მრავალნაირი ცდა, რაც არ დაწყებულა დევიდ ქემერონის დროს. ამ პროცესს წინა პრემიერ-მინისტრის მოღვაწეობისას ჩაეყარა საფუძველი და უამრავი ფაქტი გააჩნიათ იმის დასამტკიცებლად, რომ ეს გახლავთ არა დაცული, როგორც საქართველოს იუსტიციის სამინისტრო უკეთებს რეკლამას ელექტრონულ ბარათებს, არამედ ინფორმაციის შემცველი და ხაკერებისთვის ხელმისაწვდომი. ყველაზე საშინელება კი ის არის, რომ მისი შეცვლაც შეუძლიათ დაინტერესებულ პირებს. იყო შემთხვევები, როდესაც სახელმწიფო დონის ექსპერიმენტები ჩაატარეს. ნახევარ საათში გატეხეს და შევიდნენ ბაზაში ხაკერები, შეცვალეს ინფორმაციები და ამით ჩვეულებრივ იმოქმედეს.
როდესაც სახელმწიფო დონეზე ამგვარი ექსპერიმენტებია ჩატარებული და საფრანგეთის უფლებათა დამცველები და პროფკავშირების თავმჯდომარე გამოვიდნენ სიტყვით, რომ ეს არის მოქალაქისთვის უმაღლესი ზიანის მომტანი, ასეთი განვითარებული ქვეყნები ამაზე უარს ამბობენ, აქ უკვე აღარ გვაქვს საუბარი მხოლოდ იმ პროგრესთან და ტექნიკასთან, რაც საზოგადოებას სურთ მოაჩვენონ, ტექნიკის მხრივ არაპროგრესულ საზოგადოებად გამოიყვანონ ისინი, ვინც ამ კუთხით სიფრთხილეს იჩენს. ეს, თავისთავად, სიცრუეა, რადგან სხვაგვარი მაგალითები მრავლად გვაქვს.
რაც შეეხება მართლმადიდებლურ ქვეყნებს, ვიცით, რომ ნატოს ქვეყნების ევრო კავშირის გაერთიანებაშია საბერძნეთი, სადაც ათიათასობით ადამიანი სხვადასხვა რეგიონში გამოვიდა ამ საკითხთან დაკავშირებით.
ჩვენ მოგვივიდა ათონის მთის გამოხმაურება, მისი ორიგინალი, რომელიც გადავთარგმნეთ და ეკლესიაში გავავრცელეთ. ისინი მოუწოდებენ მართლმადიდებლებს, რომ ამ საბუთებით არ ისარგებლონ, არ აიღონ და ჩვეულებრივი საიდენტიფიკაციო საშუალებები გამოიყენონ.
ინგლისში აღნიშნული კანონპროექტი გააუქმეს, უარყვეს ელექტრო მმართველობა. როდესაც პრემიერ-მინისტრი დევიდ ქემერონი, ამ რანგის კაცი, აცხადებს, რომ სხვა საიდენტიფიკაციო საშუალებების გზაც არსებობს და არ საჭიროებს ჩვენთან ელექტრონული მმართველობა, აქ უკვე უნდა მიხვდნენ ადამიანები, თუ რასთან აქვთ საქმე.
ეს გახლავთ ელექტროკონტროლი, რომლითაც იოლი და იაფი უჯდება დაინტერესებულ სახელმწიფოს, აკონტროლოს ქვეყანა, ადამიანები და არა მარტო აკონტროლოს, არამედ როგორც უკვე აღვნიშნეთ, ხაკერებსაც მისცეს ინტრიგის საშუალება. შესაძლებელს ხდიან, ადამიანი ნელ-ნელა მიაჩვიონ ზომბირებას.
ადამიანს ეხსნება გრაფა, სადაც დაფიქსირებული იქნება, ცხოვრების განმავლობაში რა მოქმედებასაც გააკეთებს ID ბარათით.
ყველა განვითარებულმა ქვეყანამ უარი განაცხადა აღნიშნულ ელექტრონულ მმართველობასთან დაკავშირებით.
ძალიან მეწყინა, როდესაც გავიგე, რომ საბერძნეთში პირველი ნაბიჯი რაც გადაიდგმება ID ბარათებთან დაკავშირებით, ეს გავრცელდება ემიგრანტებზე და არა საბერძნეთის მოქალაქეებზე. აქაც ისევ ქართველობა ხვდება ამ წნეხის ქვეშ. უამრავი ჩვენი თანამემამულეა უცხოეთში წასული.
ეს ყოველივე დიდი ბოროტებაა. თვალის დახუჭვა და იმის თქმა, რომ ბარათი ჩვეულებრივი პირადობაა, ამგვარი დამოკიდებულება გულუბრყვილობა იქნება ნებისმიერი მართლმადიდებლის მხრიდან.
აქ საუბარია ღვთისგან მოცემულ ყველაზე დიდ ნებაზე, ანუ უზენაეს, თავისუფალ ნებაზე და როდესაც საშიშროება ემუქრება მის ხელყოფას, ეს, თავისთავად, არა მარტო ბოროტებაა, არამედ ძალიან დიდი დანაშაულია.
ჩემთვის, როგორც ერისკაცისთვის, მოსარიდებელია, მაგრამ მართლმადიდებლებს სხვა გზა არ გვაქვს და სიმართლის თქმა ჩვენი მოვალებაცაა.
ეს ის დრო გახლავთ, როდესაც თუკი რაიმე გულისტკივილი გაგვაჩნია, სამარიტელებივით ჩვენს სამშობლოს გვერდი არ უნდა ავუაროთ ისე, რომ ადამიანი იღუპებოდეს, მისი სულის ცხონება-არცხონებისა და წარწყმედის საკითხი წყდებოდეს და ჩვენ გულგრილობა გამოვიჩინოთ.
საქართველოში ძალიან ცუდი მდგომარეობაა ამ საკითხთან დაკავშირებით. ბევრი ვეცადეთ, იგივე სასულიერო პირებში, რომ ერთხელ მაინც მომხდარიყო ამ თემასთან დაკავშირებით შეკრება და ბაასი, შექმნილიყო კომისია, როგორც ათონის მთაზე, საბერძნეთში, ზემოთ ხსენებულ განვითარებულ ქვეყნებში…
გასაგებია, რომ ხელისუფლება ამ კუთხით არ მოქმედებს. ეკლესიას ძალიან დიდი მოვალეობა აქვს ამ მხრივ. როდესაც ადამიანის ნება ილახება, ეჭვია, რომ მისი ნების ხელყოფასთან ერთად აქ სხვადასხვა საშიშროებაც არსებობს, რომ საკრალურ ნიშნებთან გვაქვს საქმე, თავისთავად, ამაზე ეკლესია უნდა იკრიბებოდეს და განიხილავდეს არა მარტო შიდა კულუარებში, არამედ საზოგადოებაშიც.
გული ძალიან მტკივა, როდესაც ვუყურებ ტელევიზიით, როგორ გამოდიან ეპისკოპოსები, სასულიერო პირები და მრევლთან ერთად სხვადასხვა მეცნიერებთან აქვთ პოლემიკა, რაც ჩვენთან, სამწუხაროდ, ჯერ არ ხდება, თუმცა იმედი მაქვს, საქართველოშიც დაიწყება ამ საკითხზე საუბარი.
დღეს კი საქართველომ ის დიდი გამოცდილებები უნდა გაიზიაროს, რაც ევროპის განვითარებულ ქვეყნებს გააჩნია”. ქეთი ჭელიძე
მასალა აღებულია: http://www.ambioni.ge/id-baratebi-xakerebistvis-xelmisawvdomia/
|
