+

ძველი გველი ამთავრებს დედამიწის შემორკალვას. ის უკვე პირით წვდება თავის კუდს.
ჩვენ გვინდა თუ არ გვინდა, ვცხოვრობთ ისეთ დროში რომ შევესწრებით ანტიქრისტეს გამეფებას. ის უკვე მოსულია და თავის მზაკვრულ საქმეებს დაფარულში აკეთებს. იმდენად ახლოსაა მისი გამოჩენა, რომ კარზე კი არ გვიკაკუნებს, არამედ გვიბრახუნებს. მთელი ძალით კარებს ანჯღრევს, ლამის შემოამტვრიოს.
ანტიქრისტეს გამეფება სოლომონის ტაძარში იქნება, რომლის აღდგენაც უმცირეს დროში მოხდება. საამისოდ დღეს ყოველივე პირობა არსებობს.
მსოფლიოს მალე ეყოლება ერთი მბრძანებელი. შეიქმნება მსოფლიო მართვის ცენტრი, რომლის მბრძანებელიც გახდება ანტიქრისტე. შესაძლოა ეს მოხდეს მსოფლიო საყოველთაო არჩევნების გზით. ვეცადოთ, რომ არ მივიღოთ მონაწილეობა ასეთ არჩევნებში.
გავლენიანი ბოროტი ძალები ეცდებიან სხვა ქვეყნების ხელმძღვანელად გაიყვანონ მათთვის სანდო პირები, რომ შემდეგ ერთხმად დაუჭირონ მხარი ანტიქრისტეს გამეფებას.
მსოფლიო მართვის ცენტრი ვერ იარსებებს მსოფლიო გაერთიანების გარეშე. ამიტომაც ხდება დიდი გლობალური გაერთიანებები; რაც საბოლოოდ სრული გაერთიანებით უნდა დამთავრდეს.
გლობალური და სრული გაერთიანება მოიცავს, როგორც საერო ასევე სასულიერო მხარეს. საერო ხაზით ეს ხორციელდება სიტყვა დემოკრატიით, ხოლო სასულიერო ხაზით კი სიტყვა ეკუმენიზმით.
დემოკრატია ემსახურება მიზანს: საბოლოოდ შეიქმნას და ჩამოყალიბდეს ერთიანი მსოფლიო მოქალაქე, ყოველგვარი ტერიტორიის, ტრადიციისა და ეროვნების გარეშე.
ეკუმენიზმი კი ემსახურება ყველა ქვეყნისა და რწმენის ადამიანების, ერთ სალოცავში გაერთიანებას. არავინ იტყვის მაშინ მხოლოდ მართლმადიდებლობაა მართალი სარწმუნოება და გავერთიანდეთ მასში. არამედ ყველა არსებული რწმენის ლოცვებიდან შეიკრიბება და აღევლინება საერთო ლოცვა. რაც ჭეშმარიტი ღმერთისა და რწმენის დიდ ღალატს ნიშნავს. ამიტომ უნდა ვიცოდეთ, რომ ეკუმენიზმი ერესთა ერესია და მისგან მხოლოდ ღვთის შეწევნით და მტკიცე რწმენით თუ გადავრჩებით.
როგორც ვიცით, ქრისტეს შობამდე უკიდურესად გაჭირვებული ხალხი მოელოდა მხსნელს - მესიას, რომელიც ხალხს მოუტანდა სიმშვიდეს, სიკეთესა და ძლიერებას.
დღეს მსოფლიო შეთქმულების მასონური ბოროტი ძალები წინასწარ დაგეგმილად აწარმოებენ სხვადასხვა ქვეყნებს შორის ომებს, ჰქმნიან ხელოვნურ შიმშილობებს, არეულობებს და სხვადასხვა სახის დიდ გაჭირვებებს.
უკიდურესად გაჭირვებული ადამიანებისგან დღესაც ხშირად ისმის: რა გვეშველება, რა გვიხსნის, ვინ გვიხსნის. სწორედ, აი ასეთ დროს, როცა ყოველგვარი არეულობა და გაჭირვება კულმინაციას მიაღწევს და მსოფლიო თითქოს გამოუვალ ჩიხში მოექცევა, ანტიქრისტე მოევლინება ქვეყნიერებას როგორც მხსნელი.
იმის გამო, რომ ანტიქრისტეს მოსვლა უფრო მეტად მიემსგავსოს ქრისტეს ამ ქვეყნად მობრძანებას, მას წინ უსწრებს მისი წინამორბედის მოსვლა. ის ხალხს აჩვენებს ძალიან დიდ მოჩვენებით სასწაულებს. გაკვირვებული ადამიანები ლამის ღმერთად აღიარებენ. ის კი ეტყვის მათ: მე ვინ ვარ მასთან შედარებით, რომელიც მოდის თქვენს მხსნელად და პატრონადო.
როგორც ნაწინასწარმეტყველებია: "ანტიქრისტე იშვება დანის ტომიდან". იტყვიან, რომ ქალწულისგან იშვა ის. სინამდვილეში კი ბოროტი ბილწი მეძავისგან იშვება. მთელი ბოროტული სამყარო იქნება თავმოყრილი მასში, რადგან თავად სატანა იქნება ჩასახლებული შიგ.
ანტიქრისტეს ექნება მოქმედების შვიდი წელი. რომელიც იყოფა ორ ნაწილად. პირველ სამ წელიწად ნახევარში ის იბრძოლებს მსოფლიოს სრული ბატონობისა და ხალხთა ნდობის მოპოვებისთვის, ამიტომ თავდაპირველად ის იქნება ძალზედ ლოიალური, ყველა რელიგიის შემწყნარებელი, ჰუმანური და უაღრესად კეთილშობილი პიროვნების ნიღბით შეფარული. დიახ, მთელ მსოფლიოში ის დიდ სიყვარულსა და ნდობას მოიპოვებს. მის დროს შეწყდება ხელოვნური ომები და არეულობები. დრობით აღარც შიმშილობა და გაჭირვება იქნება. ხალხმა შეიძლება თქვას, რომ ოქროს ხანა დაგვიდგაო, ასევე ანტიქრისტე მოახდენს უდიდეს მოჩვენებით სასწაულებს. ციდან ცეცხლს ჩამოუშვებს და მიწიდან მთებს მაღლა აზიდავს. მსგავსი სხვა დიდი სასწაულების ხილვაზე ხალხი დაუჩოქებს და თაყვანს სცემენ, როგორც ღმერთს.
აი ასეთ დროს დარწმუნდება რა ადამიანების მთლიან დამონებაში ის მეორე სამ წელიწად ნახევარში გამოაჩენს თავის ნამდვილ ბოროტ ბრჭყალებს.
ანტიქრისტეს მოსვლას ვერ შეაჩერებს და წინ ვერ აღუდგება ვერავითარი ძალა, რადგან ზნეობრივად გადაგვარებული ადამიანების აუტანელი ცოდვების გამო, ღვთის დაშვებით ეძლევა მას მოქმედების უფლება. ეძლევა რადგანაც საბოლოოდ გაირჩეს ერთმანეთისგან თხა და ცხვარი. ანუ კეთილი და ღვთის სათნო ადამიანები, ბოროტი და ეშმაკის ნებით მოსიარულე ადამიანებისაგან.
დღეს უკვე ანტიქრისტეს გამეფებამდე, ადამიანების არსებობა ძირითადად ყიდვა-გაყიდვაზე არის დამყარებული. მალე აღარ იქნება სხვადასხვა ფული, არამედ ერთი მსოფლიო ფული. ანტიქრისტეს მეფობის დროს კი ისიც გაქრება და მის ნაცვლად ანტიქრისტე გამოსცემს თავის ბეჭედს და ამ ბეჭდით ადამიანებს დაბეჭდავენ მარჯვენა მკლავზე და შუბლზე.
ადამიანები, რომელნიც არ მიიღებენ ანტიქრისტეს ბეჭედს, არ ექნებათ არსებობის საშუალება, რადგან მის გარეშე ვერ იყიდიან და ვერც გაყიდიან რაიმეს.
ვინც ანტიქრისტეს ბეჭედს მიიღებს ვერ ცხონდება. ის სამუდამოდ ამოიშლება ქრისტეს სიცოცხლის წიგნიდან.
ყოველი ადამიანი დიდი გამოცდისა და განსაცდელის წინაშე დადგება, დაწერილია, რომ მაშინ: "მართალნიც ძნელად გადარჩნენ". ადამიანთა დიდი უმრავლესობა ნებით მიიღებს ანტიქრისტეს ბეჭედს. ძირითადად ზნეობრივად გადაგვარებული ის ურწმუნო ადამიანები, რომელნიც მხოლოდ ბილწ ხორციელ ვნებებსა და წუთისოფლის სიამეებს ელტვიან.
მორწმუნე სულის ცხონების მაძიებელ ადამიანებს მხოლოდ ერთი გამოსავალი ექნებათ: დატოვონ თავიანთი სახლები და მთებსა და მიუვალ ადგილებს შეაფარონ თავი. მარტო არავინ არ უნდა წავიდეს. შესაძლებელია ეშმაკმა კლდიდან გადაჩეხოს, ჯგუფური გასვლა კარგი იქნება, ძალა ერთობაშია. თორმეტი-ოცი კაციც შესაძლებელია, მეტი კიდევ უკეთესი.
ადამიანები რომელნიც ანტიქრისტეს ბეჭედს მიიღებენ, მალევე ინანებენ და დასწყევლიან თავიანთ გაჩენის დღეს, მაგრამ ვერაფრით უშველიან თავს. მალევე გაქრება მათი მოჩვენებითი, დროებითი ოქროს ხანის ილუზია. გართობისა და ხორციელი ვნებებით ტკბობის ნაცვლად საშინელი ტანჯვა-წამება დაეწყებათ. დაავადდებიან სხვადასხვა მტანჯველი მძიმე ავადმყოფობით. მიწიდან გამოვლენ სხვადასხვა სახის შხამიანი მკბენარები და დაკბენენ მათ. ყოველივე ამას თან დაერთვება საშინელი შიმშილი. ხე ნაყოფს აღარ გამოიღებს. ადამიანები გვამებს შეჭამენ. მათი ოქრო და ძვირფასი სამკაულები ქუჩაში ეყრება და არაფრის მაქნისი და მნიშვნელობის აღარ იქნება. ქვეყნიერების გაჩენიდან თუ რაიმე ტანჯვა-წამება ყოფილა, ყველას ერთად ბევრად გადააჭარბებს ანტიქრისტეს დროს არსებული საშინელი ტანჯვა-წამება. უკიდურესად გაჭირვებული და გატანჯული ადამიანები მივლენ მასთან და ეტყვიან: შენ ხომ ჩვენი ღმერთი ხარ, გვიშველე რამე. ის კი დაცინვით ეტყვის მათ: მე რა გიშველოთ, ხომ ხედავთ ხე ფოთოლსაც არ იღებს. მაშინ მიხვდებიან ანტიქრისტეს ბეჭდით დაბეჭდილნი, რომ ღმერთისთვის კი არა, უდიდესი ბოროტისთვის უციათ თაყვანი და მარადიული ტანჯვისთვის განმზადებულნი, უიმედო გოდებით კიდევ ერთხელ დასწყევლიან თავიანთ გაჩენის დღეს.
მათ კი, ვინც არ მიიღო ანტიქრისტეს ბეჭედი და სულის ცხონების მიზნით მთებსა და ტყეებს შეაფარა თავი, სულიწმიდის მადლი მიახვედრებთ, როგორ უნდა იარსებონ. შეიძლება ბევრი გზაშიც გარდაიცვალოს, მაგრამ მთავარი ხომ ქრისტეს გვერდით ყოფნა და სულის ცხონებაა.
იმ დროს რამდენად დიდი ცოდვებიც არ უნდა ჰქონდეს ადამიანს, თუ ანტიქრისტეს ბეჭედს არ მიიღებს და ქრისტესათვის გაუძლებს დიდ განსაცდელს, ეპატიება და ცხონდება.
დაწერილია, რომ ეს მძიმე განსაცდელები და ანტიქრისტეს ბატონობა გაგრძელდება სამწელიწადნახევარს ანუ 42 თვეს. როგორც ნათქვამია, მაშინ დროც შემცირდება, რომ მართალნიც არ დაიღუპონ.
ანტიქრისტეს ბატონობიდან ზუსტად სამ წელიწად ნახევრის გასვლის შემდეგ იქნება ქრისტეს მეორედ მოსვლა მთელი თავისი ზეციური დიდებით. მაშინ მოხდება საყოველთაო მკვდრეთით აღდგომა და ქვეყნიერების საბოლოო განსჯა. მხოლოდ ქრისტეს მიერ დამარცხდება ანტიქრისტე და ჩაინთქმება სამუდამო ცეცხლის ტბაში ყველა მის თანამზრახველ ბოროტ სულებთან ერთად.
მართალი და ის საცხოვნებელი სულები, რომელთაც არ მიიღეს ანტიქრისტეს ბეჭედი, დადგებიან ქრისტეს მარჯვნივ სამუდამო ნეტარებისთვის გამზადებულნი. ბოროტი და სიავის მომქმედნი, ასევე ის ადამიანები რომელთაც მიიღეს ანტიქრისტეს ბეჭედი, დადგებიან ქრისტეს მარცხნივ გამზადებულნი სამუდამო ტანჯვისათვის.